“Hei, lagi ngapa?” takonku karo
nyedaki bocah sing ndingkluk ing pinggire tumpukan sampah pasaw. Wis sakwetara
aku ngempet rasa penasaranku. Deweke ndengak, njur mesem. Aku mbales eseme.
“Ngluroni isi,” wangsule karo
njumput lombok bosok.
“Isi? Mmm, iku lak sayuran bosok tho?”
Aku ndodok ning ngaprepe.
“Iki
sakjane urung bosok, mmm maksudku isine urung bosok. Pancene wis ora iso
dimasak. Nanging isih iso tuwuh yen ditandur,” ujare karo mencet lombok bosok
ing tangane, “Iyo tho, isine isih apik.” Dheweke mesem.
“Wah, iku arep ditandur? Sampeyan
nduwe kebun?”
“Ora nduwe.”
“Ora? Lha koktandur neng ngendi?”
“Ing plastik-plastik , gelas-gelas
lan botol telase omben-omben. Ya pokoke neng ngendi wae sing penting isa
ditanduri,” deweke mangsuli karo ngetak tangane sing reget.
“Eh, jenengku Tata,” ujare karo
mesem.
“Eh
iya, nganti lali kenalan. Aku Linsi”
“Mmm…
iki aku wis rampung, Lin. Aku bali sik, ya? Yen sampeyan gelem, dolana neng
ngomahku, yen arep ngerti tanduranku.”
“Tenane, Ta? Omahmu neng ngendi?”
“Ora adoh kok, iku sebrange kali,” Tata nduding kali sing ana ing sebrange dalan. “Wah… aku pengen ngerti tanduranmu, Ta. Yen
ngana aku takmatur ibu sik, ya?”
Aku njur mlayu mlebu toko, nemoni ibuku,
matur yen arep dolan. Ibu nyawang Tata njur manthuk. “Dheweke bocah sing
blater. Asring blanja neng tokone awake dhewe. Ya wis, kowe oleh dolan.
Ngati-ati ya?!” pesene ibuku.
Aku lan Tata njur numpak sepeda.
Nglewati kreteg, nglewati omah-omah ing pinggire kali, njur mlebu gang.
Tata mandeg ning ngarep omah cilik
dicat ijo sing akeh tandurane. Aku uga ngerem sepedaku njur niru Tata, marker
ing ngisore wit pelem sing gedhe. Akeh kembang angrek sing tumempel wit pelem.
Ing ngarep pager dijejer macem-macem tanduran.
“Waaah, omahmu asri banget, Ta. Iki
kembang apa, kok apik temen?” aku nyekel kembang sing godhonge ombo lan
tumpuk-tumpuk.
“Ow, iku kobis. Sing biasane dingo campuran
sayur sop. Yen iki lombok-lombok lan tomate,” wangsule Tata.
Aku
ngetutne Tata tumuju gelas-gelas lan botol-botol
bekas sing isi winih-winih tanduran lagi
thukul.
“Iku sing wis awoh. Mengko takpekne
dicaosne ibumu dinggo masak, ya?”
“Lha sing neng drem, kae apa? Banyu
nggo nyiram tanduran?” aku nduding nyang pojok latar.
“Iku lele. Bapakku ngingu lele. Ora
akeh sih, ning ya cukup dingo lawuh.”
Aku nyedaki drem, nonton lele-lelene. Ngadeg
sawetara ing pojok latar, aku nyawang sak kiwa-tengen.
“Omahmu penak. Akeh tandurane,
sayuran ana, iwak uga ana. Hemm…enak wis ya, gak usah blanja neng pasar…
hehehe…”
“Iya, ngendikane bapakku, sak isane pekarangan dimanfaatake
nggo nandur-nandur. Sakliyane nambah ijo lan asri, uga isa ngirit blanja.
Winih-winih lombok lan tomat iku yen wis tuwuh lan akeh biasane dititipke neng
nggone bakul tanduran. Kadang yo digawa neng pasar Kembang didol. Akeh wong
padha golek arep ditandur.”
“Hebat banget keluargamu, Ta! Oya, bapak
lan ibumu endhi, kok sepi?”
“Kerja neng pabrik. Budal esok,
manthuk sore. Eh iki nggo sampeyan, caosna ibumu ya?” Tata ngulungake plastik
isi lombok lan tomat.
“Hah! kok akeh banget? maturnuwun yaaa. Asik tenan, isa maem saka asil tanduran
dhewe,” jareku karo nyawang lombok lan tomat abang neng njero plastik.
Aku njur selonjor neng teras. Awan
sing hawane panas, tetep krasa esis ing omahe Tata. Bedha banget karo neng
ngomahku. Ora ana hawa adem sakliyane neng kamar karo ngurepne AC. Kabeh
latarku wis dipaving lan ora ana tandurane. Ngendikane ibuku ben ora reget,
ngirit tenaga ben ora asring nyapu.
Ning,
ngebeki latar karo tanduran, nyatane luwih ngirit. Ngirit blanja, ngirit bayar
listrik. Kaya Tata, cukup mbuka jendelo kamar wis esis ora usah AC-an. Hmm…coba
kabeh-kabeh omah ing kuta kaya omahe keluargane Tata iki. Mesthi hawane seger,
nyawang ya adem.
“Kok nglamun, Lin? Ayo dimaem, iki
rujak gaweanku.”
Aku
njumbul. Tata wis lungguh neng sisihku karo nggowo saklemper rujak pelem.
“Aku
pengen blajar karo sampeyan, Ta…” jareku karo nyendok rujak.
“Blajar
apa?”
“Blajar
nandur-nandur.”
“Beres!”
wangsule Tata karo ngacungne jempole. Aku mesem, sakrenteng rencana pating
sliwer neng sirahku.
dadi pengen tiru tata.eh..mbak brina...^_^.sinau tandur.aku durung duwe wit lombok ro tomat je.gawe winih ah....
BalasHapus